2017

  • Yaradılıb 11.05.2017 17:42
  • Yenilənib 16.03.2018 16:00
  • Nəşr edilib 10.05.2017 17:42

2017-ci il ərzində Azərbaycan Respublikasında sosial sahənin inkişafı


 
Əhalinin gəlirləri. İlkin məlumatlara görə, 2017-ci ilin yanvar-dekabr aylarında ölkə əhalisinin nominal gəlirləri əvvəlki ilin eyni dövrü ilə müqayisədə nominal ifadədə 8,3 faiz artaraq 49162,9 milyon manata çatmışdır. Əhalinin hər nəfərinə düşən gəlirlər orta hesabla 5050.5 manat təşkil etmişdir.
Bütün icbari və könüllü ödənişlər edildikdən sonra əhalinin sərəncamında 44983.3 milyon manatlıq (onun hər nəfərə düşən həcmi 4621.2 manat) və ya əvvəlki ilin müvafiq dövrünə nisbətən 8.5 faiz çox vəsait qalmışdır.

Əmək haqqı. 2017-ci ilin yanvar-noyabr aylarında ölkə iqtisadiyyatında muzdla çalışan işçilərin orta aylıq nominal əmək haqqı 2016-cı ilin müvafiq dövrünə nisbətən 6.2 faiz artaraq 525.0 manat təşkil etmişdir. Əmək haqqı neft sektorunda 3062.3 manat, qeyri-neft sektorunda 465,4 manat təşkil etmişdir.
Sosial təminat. İlkin məlumatlara əsasən, 2018-ci ilin əvvəlinə 1320,4 min nəfər pensiyaçı qeydiyyatda olmuşdur ki, bu da ölkə əhalisinin 13,5 faizini təşkil edir.
Təyin olunmuş aylıq pensiyaların orta məbləği 205,5 manat təşkil etmiş və orta aylıq əmək haqqının 38,9 faizinə bərabər olmuşdur.
“Əmək pensiyaları haqqında” Azərbaycan Respublikası Qanununda dəyişikliklər edilməsi barədə” 2017-ci il 10 mart tarixli 543–VQD nömrəli Azərbaycan Respublikası Qanununa əsasən, 2017-ci il 1 iyul tarixindən əmək pensiyasının baza hissəsi ləğv edilmiş və əmək pensiyasının minimum məbləği
110 manat müəyyən olunmuşdur. Qanuna edilmiş dəyişikliyə müvafiq olaraq yaşa görə pensiya almaq üçün kişilərin yaş həddi 2017-ci il iyulun 1-dən başlayaraq 2021-ci il iyulun 1-dək, qadınların yaş həddi isə 2017-ci il iyulun 1-dən başlayaraq 2027-ci il iyulun 1-dək hər il 6 ay artırılır.
Ölkədə 80.2 min aztəminatlı ailənin 326.6 min nəfər üzvü ünvanlı dövlət sosial yardımı almışdır.
Demoqrafik vəziyyət. İlin əvvəlindən ölkə əhalisinin sayı 80731 nəfər və ya 0,8 faiz artaraq 2017-ci il dekabr ayının 1-i vəziyyətinə 9890712 nəfərə çatmışdır. Bir kvadrat kilometrə düşən əhalinin sıxlığı 114 nəfər olmuş, əhalinin ümumi sayının 53,0 faizini şəhər, 47,0 faizini kənd sakinləri, 49,9 faizini kişilər, 50,1 faizini isə qadınlar təşkil edir.
Cari ilin yanvar-noyabr aylarında ölkə üzrə 132002 doğulan körpə qeydə alınmış və əhalinin hər 1000 nəfərinə bu göstərici 14,8 təşkil etmişdir. Doğulan körpələrin 53,1 faizi oğlan, 46,9 faizi isə qız uşaqlarından ibarət olmuşdur.
Məşğulluq və işsizlik. 2018-ci il yanvarın 1-i vəziyyətinə ilkin məlumatlara əsasən, iqtisadi fəal əhalinin sayı 5073,8 min nəfər olmuş, onlardan 4822,1 min nəfərini məşğul əhali təşkil etmişdir.
2017-ci il dekabrın 1-i vəziyyətinə muzdla işləyənlərin sayı 1521.2 min nəfər, o cümlədən iqtisadiyyatın dövlət sektorunda 881.1 min nəfər, qeyri-dövlət sektorunda isə 640,1 min nəfər təşkil etmişdir. İqtisadiyyatın neft sektorunda 34,0 min nəfər, qeyri-neft sektorunda isə 1487.2 min nəfər çalışmışdır.
Müəssisə və təşkilatlarda muzdla çalışan işçilərin 22.8 faizi məhsul istehsalı sahələrində, o cümlədən 6.6 faizi tikintidə, 6,9 faizi emal sənayesində, 3,2 faizi kənd təsərrüfatı, meşə təsərrüfatı və balıqçılıq sahələrində, 2,2 faizi mədənçıxarma sənayesində, 2,1 faizi su təchizatı, tullantıların təmizlənməsi və emalı, 1,8 faizi elektrik enerjisi, qaz və buxar istehsalı, bölüşdürülməsi və təchizatı sahələrində məşğul olmuşdur.
2017-ci ilin yanvar-noyabr aylarında bir işçiyə düşən orta aylıq işlənmiş iş saatlarının miqdarı 153,2 saat təşkil etmişdir.
Qeyd olunan dövr ərzində işsizlik müavinətinin orta məbləği 291,2 manat olmuşdur.

← Geriyə