Xəbərlər

  • Yaradılıb 07.04.2018 13:43
  • Yenilənib 10.04.2018 10:40
  • Nəşr edilib 07.04.2018 13:30

Balaxanı tullantı poliqonunda növbəti yaşıllaşdırma aksiyası keçirilib

Poliqonda 1000-dən çox meyvə ağacı əkilib

 
               
Aprelin 7-də IDEA İctimai Birliyinin təşəbbüsü, İqtisadiyyat Nazirliyinin dəstəyi və “Təmiz Şəhər” ASC-nin təşkilatçılığı ilə Balaxanı Tullantıların Zərərsizləşdirilməsi Poliqonunda növbəti ağacəkmə aksiyası keçirilib və poliqonda 1000 ədəd meyvə ağacı əkilib. 
Əkilən ağaclara qulluq etmək üçün xüsusi suvarma sistemi yaradılıb və “Təmiz Şəhər” ASC-nin əməkdaşları daim ağaclara qulluq edəcək. 
Poliqon ərazisində yaşıllaşdırma işlərinin aparılması artıq ənənəyə çevrilib və bir neçə ildir ki, IDEA-nın, İqtisadiyyat Nazirliyinin və “Təmiz Şəhər”in əməkdaşları burada ağacəkmə aksiyaları keçirirlər. Balaxanı Tullantıların Zərərsizləşdirilməsi Poliqonunda indiyədək 11 mindən artıq ağac əkilib. 
Qeyd edək ki, son illər yaşıllıq və ağaclıq ərazisinə çevrilən poliqon ərazisi 2009-cu ilədək Bakının məişət tullantılarının açıq şəkildə atıldığı sahələr idi. Tullantıların üfunəti, yanma nəticəsində yaranan tüstü şəhərə yayılırdı. Qısa müddətdə məişət tullantılarının alışmasının və tüstülənmənin qarşısı tamamilə alınıb. 120 hektar əraziyə malik poliqonda lazımi infrastruktur yaradılıb və tullantıların düzgün qəbuluna başlanılıb. Bununla yanaşı, poliqon ərazisində basdırılan tullantılardan ayrılan çirkab sular xüsusi filtirlər vasitəsilə təmizlənərək texniki suya çevrilir və ağacların suvarılmasında geniş istifadə olunur. 

← Geriyə