Azərbaycan şirkətləri “INNOPROM. Belarus” sərgisində təmsil olunub

Minskdə keçirilən “INNOPROM. Belarus” beynəlxalq sənaye sərgisində Azərbaycan şirkətləri müxtəlif sahələri əhatə edən məhsullarla vahid ölkə stendində təmsil olunublar.

30 sentyabr – 2 oktyabr 2026-cı il tarixlərində iqtisadiyyat nazirinin birinci müavini Elnur Əliyevin rəhbərlik etdiyi nümayəndə heyəti Belarus Respublikasının Minsk şəhərində keçirilən “INNOPROM. Belarus” beynəlxalq sənaye sərgisində iştirak edib.

Azərbaycan şirkətləri sərgidə vahid ölkə stendi ilə təmsil olunub. Stenddə sənaye və texniki həllər, xüsusi təyinatlı işçi ayaqqabıları, lak-boya və tikinti-kimya məhsulları, sənaye filterləri, istilik izolyasiya materialları, maşınqayırma, xüsusi və sənaye texnikası, eləcə də polad və digər metal məmulatları nümayiş etdirilib.

Sərgi çərçivəsində Azərbaycan şirkətlərinin sənaye məhsul və həllərinin beynəlxalq iştirakçılara təqdim edilməsi, yeni tərəfdaşlıqların qurulması və ixrac imkanlarının genişləndirilməsi üçün müzakirələr aparılıb.

Qeyd edək ki, “INNOPROM. Belarus” sənaye, maşınqayırma, metallurgiya, sənayenin avtomatlaşdırılması, rəqəmsal texnologiyalar və innovativ həllər sahəsində fəaliyyət göstərən şirkətləri bir araya gətirən beynəlxalq sənaye platformasıdır.