Almaniya İnkişaf Bankı

Kreditanstalt für Wiederaufbau (KfW) – “Bərpa üzrə Kredit İnstitutu” 1948-ci ildə təsis edilmiş və iqtisadi və sosial şəraitin yaxşılaşdırılması, yoxsulluğun azaldılması, təbii sərvətlərin mühafizəsi və dünyada sülhün təmin olunması istiqamətində investisiya və məsləhətçi xidmətlərin göstərilməsi vasitəsilə yerli hökumət və özəl sektorla əməkdaşlığı həyata keçirir. Bankın səhmlərinin 80%-i Almaniya Hökumətinə məxsusdur. Bank Almaniyanın İqtisadi Əməkdaşlıq və İnkişaf Nazirliyi (BMZ) adından fəaliyyət göstərir. Qrant və texniki yardımlarla yanaşı KfW həmçinin digər Avropa ölkələrinin banklarına iri həcmli kreditlərin ayrılması ilə də məşğul olur.

Baş ofisi Almaniyanın Frankfurt şəhərində yerləşir. KfW-nin İdarə Heyətinin sədri 2008-ci ildən Ulrix Şröderdir. KfW Bankı dünyanın 100-dən artıq ölkəsində fəaliyyət göstərir. Bank əsasən sosial-iqtisadi infrastruktur (enerji təchizatı, nəqliyyat, telekommunikasiya), kənd təsərrüfatı və resursların mühafizəsi, kiçik və orta müəssisələrin kreditlə təmin olunması sahələrində fəaliyyət göstərir. KfW Bankı Azərbaycanla 1994-ci ildən əməkdaşlıq etməyə başlamışdır. 1998-ci ildən isə bankın Azərbaycanda daimi nümayəndəliyi fəaliyyət göstərir.

İndiyə qədər qədər KfW Azərbaycanda müxtəlif investisiya layihələrinin maliyyələşdirilməsi və məsləhət xidmətlərinin göstərilməsini həyata keçirmişdir. Hazırda KfW tərəfindən 2 layihə həyata keçirilir.

 

KfW tərəfindən həyata keçirilən layihələr

 

1

Cənubi Qafqaz üçün Ekoregional Təbiəti Mühafizə Proqramı çərçivəsində “Samur-Yalama Milli Parkının yaradılması” layihəsi

Benefisiar: Ekologiya və Təbii Sərvətlər Nazirliyi
Müddəti: 2021-2026

 

2

Zaqatala biosfer rezervatının yaradılması

Benefisiarlar: Maliyyə Nazirliyi, Ekologiya və Təbii Sərvətlər Nazirliyi

Müddəti: 2020-2024