İqtisadiyyat Nazirliyi tərəfindən dövlət təhlükəsizliyindən irəli gələn hallar istisna olmaqla lisenziyaların “ASAN xidmət” mərkəzləri, KOB evləri və “Lisenziyalar və icazələr” portalı vasitəsilə verilməsi 2025-ci ilin 1-ci rübü ərzində də uğurla davam etdirilmişdir. Lisenziyalar və icazələr sahəsində 2015-ci ilin sonlarından etibarən aparılan islahatların nəticəsi olaraq İqtisadiyyat Nazirliyi tərəfindən 1 noyabr 2015-ci il tarixindən 31 mart 2025-ci il tarixinə kimi 17497 (o cümlədən 2025-ci ilin 1-ci rübü ərzində 355) lisenziya verilmişdir.
Qrafik 1. Verilmiş lisenziyaların illər üzrə bölgüsü.
Azərbaycan Respublikası Prezidentinin “Dövlət xidmətlərinin göstərilməsində şəffaflığın artırılması, yaşayış yeri üzrə qeydiyyat və lisenziyalaşdırma prosedurlarının elektronlaşdırılması sahəsində bəzi tədbirlər haqqında” 2015-ci il 31 avqust tarixli 588 nömrəli Fərmanının 2-ci hissəsinin və “Lisenziyalar və icazələr” portalı haqqında Əsasnamə”nin təsdiq edilməsi barədə 2017-ci il 21 yanvar tarixli 1205 nömrəli Fərmanının 4.1-ci bəndinin icrası məqsədilə lisenziyaların və icazələrin elektron qaydada verilməsi üçün “Lisenziyalar və icazələr” portalı yaradılmışdır. İqtisadiyyat Nazirliyi tərəfindən 23 fəaliyyət növü üzrə lisenziyaların elektron qaydada verilməsi üçün portal vasitəsilə müraciətlərin qəbulu, 8 aidiyyəti qurumdan rəyin alınması və nəticələrin rəsmiləşdirilməsi imkanları təmin edilmişdir.
2025-ci ilin 1-ci rübü ərzində “Lisenziyalar və icazələr” portalının fəaliyyətinin təkmilləşdirilməsi, informasiya sistemlərinin portala inteqrasiyası istiqamətində işlər davam etdirilmiş və sahibkarlara portal vasitəsilə 273 elektron lisenziya təqdim olunmuşdur. Ümumilikdə, “Lisenziyalar və icazələr” portalının fəaliyyətə başladığı 01.03.2018-ci il tarixindən 31.03.2025-ci il tarixinə kimi portal vasitəsilə 6167 elektron lisenziya verilmişdir.
Qrafik 2. 2025-ci ilin 1-ci rübü ərzində verilmiş lisenziyaların fəaliyyət növləri üzrə bölgüsü.
