İqtisadiyyat Nazirliyi tərəfindən dövlət xidmətlərinin göstərilməsində səmərəliliyin artırılması məqsədilə tələb olunan sənədləri elektron qaydada əldə etmək üçün innovativ yeniliklərin tətbiqi, xidmət sferasının genişləndirilməsi və prosedurların optimallaşdırılması ilə istifadəçilərin məmnunluq səviyyəsinin artırılması prioritet əhəmiyyət kəsb edir.
Göstərilən xidmətlərin elektronlaşdırılması və informasiya sistemləri arasında məlumat mübadiləsinin avtomatlaşdırılması istiqamətində işlər davam etdirilməkdədir. Sahibkarlar həmin xidmətlərdən istifadə edərək zəruri iqtisadi və hüquqi informasiya əldə edə və sahibkarlıq fəaliyyəti ilə bağlı hüquq müəyyən edən bəzi sənədləri (lisenziyalar, mənşə sertifikatı, kommersiya qurumlarına və publik hüquqi şəxslərə münasibətdə qrant müqavilələrinin (qərarlarının) qeydə alınmasına dair bildiriş və s.) almaq üçün müraciət edə bilərlər.
Nazirlik tərəfindən göstərilən elektron xidmətlərə “www.economy.gov.az”, “www.lisenziya.gov.az” və Nazirliyin strukturuna daxil olan və tabeliyindəki qurumların internet səhifələrində yaradılmış elektron xidmət bölmələri, həmçinin müvafiq xidmətin adını əks etdirən bölmə vasitəsilə müraciət etmək mümkündür. Hazırda İqtisadiyyat Nazirliyinin fəaliyyət istiqamətləri üzrə vətəndaşlara, o cümlədən sahibkarlara 267 xidmət göstərilir ki, onların 73%- i (195 xidmət) elektronlaşdırılmışdır.
Qrafik 1. Xidmətlərə, o cümlədən elektron xidmətlərə müraciət sayı.
İqtisadiyyat Nazirliyi tərəfindən xidmət sferasının genişləndirilməsi, prosedurların optimallaşdırılması və vətəndaş məmnunluğunun artırılması istiqamətində işlər davam etdirilir. Nazirlik tərəfindən göstərilən xidmətlərə 2024-cü ilin yanvar-sentyabr ayları ərzində 14 milyon 851 mindən artıq müraciət qeydə alınmışdır ki, onların 95.2%-i (14 milyon 136 mindən artıq müraciət) elektron xidmətlərin payına düşür. İqtisadiyyat Nazirliyinin fəaliyyət istiqamətləri üzrə təqdim edilən elektron xidmətlərə əlçatanlığı təmin etmək məqsədilə Elektron Xidmətlər Portalının yeni versiyası hazırlanaraq pilot rejimdə istifadəyə verilmişdir. Portalın istifadəsi Nazirliyin fəaliyyət istiqamətləri üzrə vətəndaşlara, dövlət qurumlarına və sahibkarlıq subyektlərinə göstərilən elektron xidmətlərin keyfiyyətinə, dayanıqlığına və əlçatanlığına müsbət töhfəsini verəcəkdir. "Elektron Xidmətlər Portalı" istifadəçilərə elektron kabinet vasitəsilə xidmətlərdən yararlanmağa və lazımi məlumatların əldə olunmasına imkan yaradır. Portal bütün xidmətlər üçün vahid pəncərə rolunu oynamaqla yanaşı, hesabatlılıq və elektronlaşan xidmətlərin qiymətləndirilməsini təmin edəcək rəqəmsal platforma rolunu oynayacaqdır. Xidmət istifadəçiləri müraciət etdikləri elektron xidmətin icra prosesini izləmək və xidmətdən istifadə ilə bağlı dəyərləndirmə aparmaq imkanına malikdirlər
