İqtisadiyyat nazirinin müavini Sahib Ələkbərov “Uğur yolu” karyera inkişafı proqramının qalibi Nicat İsaqov ilə mentorluq proqramı çərçivəsində növbəti görüş keçirib.
Nazir müavini İqtisadiyyat Nazirliyinin kadr ehtiyatı bankının yaradılmasında “Uğur yolu” karyera inkişafı proqramının əhəmiyyətindən danışıb, iştirakçı ilə şəxsi inkişaf və idarəçilik təcrübəsini bölüşüb, qarşıdakı dövrdə onun liderlik və peşəkar bacarıqlarının artırılması üçün atılacaq zəruri addımları qeyd edib.
Nicat İsaqov mentorluq proqramı üçün təşəkkürünü bildirib, qazandığı təcrübənin özünün idarəetmə bacarıqlarının inkişafında önəmli olduğunu vurğulayıb.
Görüşdə kadr potensialının düzgün idarə edilməsi, iş mühitində səmərəliliyin artırılması, təhliletmə və qərarvermə bacarıqları ilə bağlı yanaşmalar müzakirə edilib, suallar cavablandırılıb.
Qeyd edək ki, mentorluq proqramı “Uğur yolu” müsabiqəsinin qaliblərinin şəxsi inkişafı üçün tətbiq edilir, İqtisadiyyat Nazirliyinin rəhbər şəxsləri ilə 1 il müddətində mütəmadi görüşlərin, müzakirələrin keçirilməsini və birgə işləməyi nəzərdə tutur.
