İqtisadi Əməkdaşlıq Təşkilatı

Təşkilatın adı

İqtisadi Əməkdaşlıq Təşkilatı (İƏT)

Təşkilata dair ümumi məlumat

·         Yaranma tarixi: 1964-cü il.

·         1964-cü ildə İran, Pakistan və Türkiyə tərəfindən İnkişaf üçün Regional Əməkdaşlıq (İRƏ) adı ilə üç ölkə arasında iqtisadi, texniki və mədəni əməkdaşlığı möhkəmləndirmək məqsədilə yaradılmış təşkilat 1985-ci ildən etibarən İqtisadi Əməkdaşlıq Təşkilatı adlandırılmışdır.

·         Məqsədi: davamlı iqtisadi artıma nail olunması, üzv dövlətlərin davamlı iqtisadi inkişafının təmin edilməsi, ticarətin liberallaşdırılması və region daxili ticarətin təşviqi, üzv dövlətlərin iqtisadiyyatının dünya iqtisadiyyatına tədricən inteqrasiyası, nəqliyyat və kommunikasiya sisteminin inkişaf etdirilməsi, iqtisadiyyatın liberallaşdırılması, İƏT regionunun maddi sərvətlərinin səmərəli istifadəsi.

·         Baş katib: Xusrav Noziri (13.08.2021-ci ildən).

·         Mənzil qərargah: Tehran, İran.

·         Üzv ölkələrin sayı: 10 (Azərbaycan, Əfqanıstan, Qazaxıstan, Qırğızıstan, Pakistan, Tacikistan, Türkiyə, Türkmənistan, Özbəkistan, İran).

Azərbaycan ilə əməkdaşlıq barədə məlumat

·         Azərbaycanın üzvlüyü: 1992-ci il

·         İƏT-in 9-cu və 12-ci Zirvə Toplantıları müvafiq olaraq 2006 və 2012-ci illərdə Bakıda keçirilmiş, Bakı Bəyannamələri qəbul edilmişdir.

·         2014-cü ilin oktyabrın 1-də İƏT üzv ölkələrinin İqtisadi Beyin Mərkəzlərinin 2-ci Bakı Forumu və "Enerji, Regional İnteqrasiya və Sosial-İqtisadi İnkişaf" mövzusunda 2-ci Beynəlxalq Konfrans baş tutmuşdur.

·         1 mart 2017-ci il tarixində Pakistan İslam Respublikasının İslamabad şəhərində İƏT-in 13-cü Zirvə görüşü keçirilmişdir. Zirvə görüşündə Azərbaycan Respublikasının prezidenti cənab İlham Əliyevin rəhbərliyi altında nümayəndə heyətinin tərkibində iqtisadiyyat naziri iştirak etmişdir.

·         14-16 yanvar 2020-ci il tarixlərində İran İslam Respublikasının paytaxtı Tehran şəhərində keçirilən İqtisadi Əməkdaşlıq Təşkilatının Regional Planlaşdırma Şurasının 30-cu iclasında İqtisadiyyat Nazirliyi tərəfindən iştirak təmin edilmişdir.

·         4 mart 2021-ci il tarixində virtual formatda İƏT-in 14-cü Zirvə Toplantısı keçirilmişdir. Qeyd olunan iclas çərçivəsində İƏT-in Tədqiqat Mərkəzinin Nizamnaməsi iqtisadiyyat naziri Mikayıl Cabbarov və Türkiyənin ölkəmizdəki səfiri Erkan Özoral tərəfindən müvafiq olaraq Azərbaycan və Türkiyə adından imzalanmışdır.

·         26 may 2021-ci il tarixində İƏT-in virtual formatda təşkil edilən iqtisadiyyat/maliyyə nazirlərinin 5-ci iclasında iqtisadiyyat naziri Mikayıl Cabbarov və nazir müavini Rövşən Nəcəf iştirak etmişdir.

·         28 noyabr 2021-ci il tarixində Türkmənistanın Aşqabad şəhərində keçirilən İƏT-in 15-ci Zirvə Toplantısında Azərbaycan Respublikasının nümayəndə heyətinin tərkibində iqtisadiyyat naziri iştirak etmişdir.

·         16-20 yanvar 2023-cü il tarixində virtual formatda keçirilən İƏT-in Regional Planlaşdırma Şurasının 33-cü iclasında İqtisadiyyat Nazirliyi təmsil olunmuşdur.

·         28 may 2024-cü il tarixində virtual formada keçirilmiş İƏT-in Əmtəə Birjaları Rəhbərlərinin 1-ci iclasında İqtisadiyyat Nazirliyi təmsil olunmuşdur.

·         5 iyun 2024-cü il tarixində keçirilmiş İƏT-in İqtisadi Tədqiqatlar üzrə Daimi İdarəetmə Komitəsinin (EPSCER) 7-ci iclasında İqtisadiyyat Nazirliyi təmsil olunmuşdur.