İqtisadi Elmi Tədqiqat İnstitutunda iqtisadi biliklər barədə Azərbaycan dilində maariflənməyə töhfə verməyə hesablanmış “Rəqəmsal iqtisadiyyat: İzahlı lüğət” və “Nəticəəsaslı Monitorinq və Qiymətləndirmə Sistemi: Metodoloji Tövsiyələr” kitablarının təqdimatı keçirilib.
İqtisadi Elmi Tədqiqat İnstitutunda (İnstitut) İdarə Heyəti sədrinin birinci müavini i.e.d. Arzu Hüseynovanın “Rəqəmsal iqtisadiyyat: İzahlı lüğət” kitabı və dövlət başçısının sərəncamları ilə “Füzulinin azad olunmasına görə” “Xocavəndin azad olunmasına görə” və “Cəbrayılın azad olunmasına görə” medalları ilə təltif olunmuş, İnstitutun İqtisadi inkişaf siyasətinin təhlili şöbəsinin elmi işçisi Faiq Qasımlının “Nəticəəsaslı Monitorinq və Qiymətləndirmə Sistemi: Metodoloji Tövsiyələr” kitablarının təqdimatı keçirilib. Tədbirdə müvafiq elm adamları və sahə mütəxəssisləri iştirak ediblər.
İnstitutun İdarə Heyətinin sədri Mahir Hümbətov təqdimatda bildirib ki, kitablar fərqli mövzularda olsalar da, hər ikisi Azərbaycan dilində iqtisadi biliklər barədə maariflənməyə töhfə verməyə hesablanıb. “Rəqəmsal iqtisadiyyat: İzahlı lüğət” kitabına rəqəmsal iqtisadiyyat üzrə 608 termin daxil edilib. Kitab dörd hissədən: Azərbaycan dilində rəqəmsal iqtisadiyyata aid terminlərin izahından, həmin terminlər üzrə ingilis– Azərbaycan dilləri, rus–Azərbaycan dilləri və Azərbaycan–ingilis–rus dilləri lüğətlərindən ibarətdir.
“Nəticəəsaslı Monitorinq və Qiymətləndirmə Sistemi: Metodoloji Tövsiyələr” kitabında ən qabaqcıl beynəlxalq təcrübəyə əsaslanaraq monitorinq və qiymətləndirmənin aydın anlayışları və sistemin qurulmasına dair müxtəlif tətbiqi alətlərə dair praktiki nümunələr verilib. Kitab struktur etibarilə monitorinq və qiymətləndirmənin müvafiq sahədə ümumi vəziyyətin diaqnostikasından başlayaraq, sistemin dayanıqlılığının təmin edilməsi üçün zəruri olan fəaliyyətlərindən də bəhs edir.
Tədbirdə kitabların əhatə etdiyi məsələlərlə bağlı müzakirələr aparılıb, suallar cavablandırılıb.
