Ankarada təşkil olunan “Azərbaycana yatırım fürsətləri” mövzusunda tədbirdə ölkəmizin investisiya imkanları barədə məlumat verilib, Türkiyə ilə iqtisadi əməkdaşlığın gücləndirilməsi müzakirə olunub.
Azərbaycanın Türkiyədə ticarət nümayəndəsinin aparatı, Türkiyə Ticarət və Sənaye Palataları Birliyi və ölkəmizin Türkiyədə Səfirliyinin birgə təşkilatçılığı ilə Ankarada "Azərbaycana yatırım fürsətləri" mövzusunda tədbir keçirilib.
Azərbaycanın Türkiyədə səfiri Rəşad Məmmədov, ölkəmizin Türkiyədə ticarət nümayəndəsi Tamerlan Tağıyev və Türkiyə Ticarət və Sənaye Palataları Birliyinin rəhbəri Rıfat Hisarcıklıoğlu tədbirdə çıxış ediblər. Natiqlər Azərbaycan və Türkiyə arasında iqtisadi əməkdaşlığın gücləndirilməsi, sərmayə qoyuluşu sahələrində yeni imkanlar, Azərbaycanın işğaldan azad edilmiş ərazilərinin investisiya potensialı və biznes dairələri arasında əlaqələrin genişləndirilməsi məsələləri barədə fikirlərini bildiriblər.
Tədbirdə Azərbaycanın sərmayə imkanlarını tanıdan videotəqdimat nümayiş olunub, investisiya tərəfdaşlığının möhkəmləndirilməsi haqqında fikir mübadiləsi aparılıb.
